Udhëtimet më të bukura që mund të bëni në mars

Ka disa evente që ndodhin vetëm një herë përgjatë një viti, në muajin mars.

Nëse vizitoni të njëjtat vende në periudha të tjera nuk është e njëjta gjë.

Nëse po mendoni të bëni një udhëtim në mars ose nëse doni të jeni dëshmitarë të një prej këtyre fenomeneve që ndodhin vetëm në këtë periudhë të vitit, ja destinacionet ku duhet të shkoni!

Në Japoni, për të parë spektaklin e Hanami

Në mars, qytetet dhe fshatrat japoneze ngjyrosen në ngjyrë rozë nga çelja e luleve të qershisë, Hanami. Kjo traditë, më shumë se një mijëvjeçare, vijon ende në ditët e sotme, saqë nxit migrimin e miliona japonezëve nga qyteti i tyre drejt 60 lokaliteteve më të famshme në Japoni për të shijuar spektaklin e rizgjimit të pranverës.

Një ndër vendet më të bukura është Parku Maruyama në Kioto, Parku Ueno në Tokio, Kështjella Himeji dhe Kështjella në Hirosaki. Lulja e qershisë, delikatesa e saj, jeta e saj e shkurtër janë për japonezët simbol i brishtësisë, por edhe i rilindjes.

Hanami zhvillohet edhe natën, në këtë rast merr emrin Yozakura (“qershia e natës”) për të admiruar sakura-t (qershitë) të ndriçuara posaçërisht me drita për të nxjerrë më në pah bukurinë e tyre.

 

Në Holandë, gjatë hapjes së Kopshtit Keukenhof

Kopshti i famshëm Keukenhof, rreth gjysmë orë larg nga Amsterdami, hap dyert e tij më 22 mars 2018. Është cilësuar parku i luleve më i bukur në botë. Në një hapësirë prej 32 hektarësh lulëzojnë më shumë se 7 milionë lule në pranverë, ndër të cilat tulipanë (më shumë se 800 varietete) zambakë dhe lule të tjera.

Përveç shumëllojshmërisë, në park gjenden edhe 2.700 pemë. Çdo vit përcaktohet një temë, dhe për 2018 është “Romancë në Keukenhof”. Tema do të përfaqësohet nga një mozaik i madh prej 250 metrash katrorë, për realizimin e të cilit janë përdorur 50.000 bulbe tulipanësh e zambakësh.

 

Në Irlandë për Festën e Shën Patrikut

Më 17 mars, në gjithë Irlandën festohet Dita e Shën Patrikut. Dublini është qyteti ku do të mbahen festimet kryesore për pesë ditë (15 – 19 mars). Kulmi i festës është parada më 17 mars që do të zhvillohet në rrugët e qendrës së kryeqytetit, në një ndërthurje ngjyrash, muzike dhe evente dhe turma njerëzish që festojnë anekënd qytetit. Edhe në Cork, do të zhvillohen festime të rëndësishme për Ditën e Shën Patrikut, po ashtu edhe në Belfast, ku organizohet St Patrick’s Day Carnival Parade.

Por në ishull do të ketë anekënd festime të mëdha, si në qytete të vogla edhe në qytete të mëdha, si për shembull Limerick, Wicklow, Derry-Londonderry, Longford, Letterkenny, Waterford, Killarney e Galway.
Dy nga vendet më të lidhura me Shën Patrikun – Armagh e Downpatrick, në Irlandën e Veriut – organizojnë çdo vit një festival muzikor, argëtues e kulturor. Ky është një rast i mirë përjetuar trashëgiminë e madhe të Shenjtit të Irlandës, në një vend i njohur si ‘St Patrick’s Country’.

You must be logged in to post a comment Login